បន្ទាយមានជ័យ ៖ ថ្ងៃទី៥ ខែធ្នូ ឆ្នាំ២០១៨ ឧត្តមសេនីយ៍ឯក នាក់ យុទ្ធា អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន និងឯកឧត្តម អ៊ុ រាត្រីអភិបាលរង ប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្តបន្ទាយមានជ័យ បានបើកកិច្ចប្រជុំផ្សព្វផ្សាយរបាយការណ៍នព្វមាស (៩ខែ)លើកទិសដៅឆ្នាំ២០១៨ របស់អាជ្ញាធរជាតិប្រយុទ្ធប្រឆាំងគ្រឿងញៀនដោយមានការចូលរួមពីតំណាងគណកម្មាធិការត្រួតពិនិត្យគ្រឿងញៀនខេត្ត ក្រុង ស្រុក ឃុំ សង្កាតកងកំលាំងប្រដាប់អាវុធទាំងបីប្រភេទ និងម្ចាស់ទីតាំងសេវាកំសាន្តសប្បាយ ផ្ទះសំណាក់ សណ្ឋាគារ ក្លឹបកំសាន្ត ខារ៉ាអូខេ។
ឯកឧត្តម អ៊ុ រាត្រី អភិបាលរង ប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្តបន្ទាយមានជ័យ បានមានប្រសាសន៍ស្វាគមន៍ដោយបានលើកឡើងថា បញ្ហាគ្រឿងញៀន ជាបញ្ហាសកល និងជាឧក្រិដ្ឋកម្មឆ្លងដែនបង្កមហន្តរាយយ៉ាង ធំធេងដល់ប្រជាពលរដ្ឋ គ្រួសារ សហគមន៍ និងសង្គមជាតិទាំងមូល។ ដោយឡែកខេត្តបន្ទាយមានជ័យ មិនមែនជាមូលដ្ឋាននៃការផលិតគ្រឿងញៀននោះទេ ប៉ុន្ដែបាននឹងកំពុងទទួលរងឥទ្ធិពលនៃការចរាចរគ្រឿងញៀនឆ្លងកាត់បង្កឲ្យមានបញ្ហាស្មុគស្មាញដល់បញ្ហាអសន្ដិសុខ សណ្ដាប់ធ្នាប់ និងការអភិវឌ្ឍន៍សង្គម ជាមួយគ្នានេះខេត្តបានអនុវត្តវិធានការទាំង៥ ដោយធ្វើការអប់រំផ្ទាល់មានអ្នកចូលរួមសរុបចំនួន១០១.៥៩៣នាក់ បង្ក្រាប៣២៣ករណី ឃាត់ខ្លួន៩២១នាក់ (ជនជាតិបរទេស២២នាក់) ដកហូតបានវត្ថុតាងមួយចំនួន។
ក្នុងនាម ឯកឧត្តម នាយឧត្តមសេនីយ៍ មាស វិរិទ្ធ ឧត្តមសេនីយ៍ឯក នាក់ យុទ្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀនសាទរដល់កិច្ចខិតខំប្រឹងប្រែងរបស់គណកម្មាធិការត្រួតពិនិត្យគ្រឿងញៀនខេត្ត ស្រុក ក្រុង ឃុំ សង្កាត់ ដែលបានតស៊ូបង្ការទប់ស្កាត់ បង្ក្រាបបទល្មើសគ្រឿងញៀនពិសេសទប់ស្កាត់បទល្មើសគ្រឿងញៀនឆ្លងកាត់ព្រំដែន និងការជម្រុញអ្នកញៀនគ្រឿងញៀនទៅទទួលការព្យាបាលនៅតាមមណ្ឌលសុខភាព មន្ទីរបង្អែក ក្នុងភូមិសាស្ត្រខេត្តបន្ទាយមានជ័យ ។
ក្នុងឱកាសនោះដែរ ឧត្តមសេនីយ៍ឯក នាក់ យុទ្ធា បានថ្លែងបន្តដោយសង្កត់ធ្ងន់ថា យុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាលមិនមែនជាសង្គ្រាមប្រឆាំងគ្រឿងញៀនទេ ប៉ុន្តែជាយុទ្ធនាការប្រមូលផ្តុំកំលាំងសរុប មធ្យោបាយសរុប និងការចូលរួមគ្រប់សមាសភាពទាំងអស់ក្នុងសហគមន៍ដោយចាប់ផ្តើមបុគ្គលគ្រប់រូប ក្រុមគ្រួសារ និងសហគមន៍ ដោះស្រាយបញ្ហាគ្រឿងញៀន។
បន្ថែមលើលទ្ធផល ការងារ ៩ខែ ឧត្តមសេនីយ៍ឯក នាក់ យុទ្ធា បានធ្វើការសំណូមពរដល់គណកម្មាធិការត្រួតពិនិត្យគ្រឿងញៀនខេត្ត មាន៖
១.ជម្រុញសកម្មភាពគណកម្មការសម្របសម្រួលការងារព្យាបាលអ្នកញៀនគ្រឿងញៀនដោយផ្អែកលើសហគមន៍គ្រប់ឃុំសង្កាត់ដើម្បីបញ្ជូនអ្នកញៀនទៅទទួលយកការព្យាបាលនៅតាមមណ្ឌលសុខភាព ពេទ្យបង្អែក ទាំង៣០កន្លែង ។
២.ខិតខំកសាងជនបង្គោល សម្រាប់ការងារផ្សព្វផ្សាយផ្តល់ការយល់ដឹងទៅគ្រប់គោលដៅទាំងអស់ពិសេសគោលដៅក្លឹបកំសាន្តសប្បាយ ផ្ទះសំណាក់ សណ្ឋាគារ បន្ទប់ជួល សិស្សអវត្តមានពីការសិក្សាច្រៀន ជនមិនមានមុខរបរច្បាស់លាស់ អ្នកបើកបរ និងតំបន់មិនទាន់រៀបរយ ជាដើម ។ល។
៣.បន្តចាត់វិធានការការអនុវត្តវិធានការរដ្ឋបាលឲ្យបានតឹងរឹងអនុវត្តច្បាប់កុំឲ្យជនល្មើសឆ្លៀតឱកាសប្រព្រឹត្តបទល្មើសជ្រកក្រោមស្លាកសញ្ញាអាជីវកម្មគ្រប់ប្រភេទ។
៤.សុំឲ្យគ្រប់ផ្នែកពាក់ព័ន្ធទាំងអស់ “បំពេញការងារតាមតួនាទីភារកិច្ច កុំចាំតែបទបញ្ជា “។
៥.បន្តពង្រឹងប្រសិទ្ធភាពការផ្តល់សេវាព្យាបាលអ្នកញៀនគ្រឿងញៀន ភាពញៀនគ្រឿងញៀនជាជំងឺខួរក្បាលអាចព្យាបាលបាន។
