រាជធានីភ្នំពេញ :ថ្ងៃទី៦ ខែវិច្ឆិកា ឆ្នាំ២០១៨ ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានទទួលជួបឯកឧត្តម ផាន់យ៉ារ៉ាក់ ភូលថាប់ ក្នុងឱកាសដែលឯកឧត្តមត្រូវបានរាជរដ្ឋាភិបាលតែងតាំងជាអគ្គរាជទូតវិសមញ្ញនិងពេញសមត្ថភាពនៃព្រះរាជាណាចក្រថៃ ប្រចាំនៅព្រះរាជាណាក្រកម្ពុជា ។
ក្នុងឱកាសនោះ ឯកឧត្តម នាយឧត្តមសេនីយ៍កែ គឹមយ៉ាន បានុស្វាគមន៍និងបានលើកយកពីការគាំទ្រយ៉ាងពេញលេញពីភាគីថៃដល់ការស្វែងរកសន្តិភាពរបស់កម្ពុជានិងក្រោយកម្ពុជាទទួលបាននូវសន្តិភាពកិច្ចព្រមព្រៀងសន្តិភាពទីក្រុងប៉ារីស តែកម្ពុជានៅតែមិនអាចខ្វះបាននូវកិច្ចសហការពីភាគីមិត្តក្នុងនាមជាប្រទេសជិតខាងជាបងប្អូនដែលមានទំនាក់ទំនងជាមួយគ្នាលើគ្រប់វិស័យជាយូរលង់ណាស់មកហើយ។
ក្នុងឱកាសនោះដែរ ឯកឧត្តម នាយឧត្តមសេនីយ៍កែ គឹមយ៉ាន ក៏បានមានជម្រាបជូនភ្ញៀវផងដែរពីលទ្ធផលកិច្ចសហប្រតិបត្តិការត្រួតពិនិត្យគ្រឿងញៀនកម្ពុជា-ថៃ នាពេលកន្លងមកដូចជា មានជាអាទិ៍ :
១.ភាគីថៃបានជួុយបណ្តុះបណ្តាលមន្ត្រីជំនាញ និងជួយកសាងមជ្ឈមណ្ឌលព្យាបាលលើថវិកាគាំទ្រជាង៥២លានបាត ពីឆ្នាំ២០១៤-២០១៨ (នៅឆ្នាំ២០១៧ បានជួយកសាងមជ្ឈមណ្ឌលព្យាបាលនៅខេត្តព្រះសីហនុ លើថវិកាជាង៤០លានបាត)។
២.ជួយពង្រឹងសមត្ថភាពអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀននិង ផ្តល់សម្ភារបច្ចេកទេសដល់មន្ទីរពិសោធន៍គ្រឿងញៀន។
៣.ពង្រឹងដំណើរការការិយាល័យទំនាក់ទំនងព្រំដែន BLOក្នុងគោលដៅទប់ស្កាត់បទល្មើសគ្រឿងញៀនឆ្លងកាត់ព្រំដែន។
ជាមួយនឹងលទ្ធផលខាងលើ ឯកឧត្តម នាយឧត្តមសេនីយ៍កែ គឹមយ៉ាន ក៏បានជម្រាបជូនភ្ញៀវពីសភាពការណ៍គ្រឿងញៀនទាំងក្នុងក្របខ័ណ្ឌ អនុតំបន់ តំបន់ ពិភពលោក និងនៅកម្ពុជា និងកិច្ចខិតខំប្រឹងប្រែងតស៊ូប្រយុទ្ធប្រឆាំងគ្រឿងញៀនរបស់សមត្ថកិច្ចក្រោមការគាំទ្រពីអាជ្ញាធរជាតិប្រយុទ្ធប្រឆាំងគ្រឿងញៀន និងយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៣ រយ:ពេល១១ខែចុងក្រោយនេះដោយបានធ្វើការបង្ក្រាបការជួញដូរគ្រឿងញៀនជាច្រើនករណី ដកហូតបាននូវវត្ថុតាងនិងមធ្យោបាយបម្រើដល់សកម្មភាពជួញដូរបានយ៉ាងច្រើនផងដែរ។
ទន្ទឹមនឹងនេះសំដៅធានាប្រសិទ្ធភាពលើការងារត្រួតពិនិត្យគ្រឿងញៀនឯកឧត្តម នាយឧត្តមសេនីយ៍កែ គឹមយ៉ាន បានស្នើសុំការជួយពីភាគីថៃ ដូចខាងក្រោម :
១.ជួយពង្រឹងយន្តការត្រួតពិនិត្យគ្រឿងញៀន ពង្រឹងសមត្ថភាពមន្ត្រីការិយាល័យទំនាក់ទំនងព្រំដែន BLO និងការអនុវត្តផែនការភូមិសគ្មានគ្រឿងញៀនសំដៅទប់ស្កាត់ការចរាចរណ៍គ្រឿងញៀនឆ្លងកាត់ព្រំដែន ចំពោះការអនុវត្តផែនការភូមិសគ្មានគ្រឿងញៀនកម្ពុជានឹងធ្វើជាសិក្ខាសាលាដកបទពិសោធន៍នៅខេត្តស្ទឹងត្រែងក្រោមការដឹកនាំផ្ទាល់ពីឯកឧត្តម ឧបនាយករដ្ឋមន្ត្រី ។
២.បន្តចូលរួមអនុវត្តគម្រោងសុវត្ថិភាពទន្លេមេគង្គ
៣.បន្តជួយលើការងារកសាងហេដ្ឋារចនាសម្ព័ន្ធមជ្ឈមណ្ឌលជាតិផ្តល់សេវាព្យាបាលដោយស្មគ្រ័ចិត្តនិងផ្អែកលើសហគមន៍នៅខេត្តព្រះសីហនុ ។
៤.បន្តជួយពង្រឹងសមត្ថភាពអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ពង្រឹងសមត្ថភាពមន្ត្រីជំនាញ និងផ្តល់ឧបករណ៍ដល់មន្ទីរពិសោធន៍គ្រឿងញៀន។
៥.បន្តកម្មវិធីធ្វើទស្សនកិច្ចសិក្សាដកពិសោធន៍ការងារត្រួតពិនិត្យគ្រឿងញៀនដល់មន្ត្រីអនុវត្តច្បាប់កម្ពុជា។
៦.ជួយគាំទ្រនិងការពារដល់ពលករកម្ពុជាដែលបាននិងកំពុងបំពេញការងារនៅប្រទេសថៃ។
ជាការកិច្ចឆ្លើយតប ឯកឧត្តម ផាន់យ៉ារ៉ាក់ ភូលថាប់ អគ្គរាជទូតថៃ បានមានប្រសាសន៍ថ្លែងអំណរគុណ និងវាយតម្លៃខ្ពស់ចំពោះការរីកម្រើនរបស់កម្ពុជាក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក្រោយទទួលបាននូវកិច្ចព្រមព្រៀងសន្តិភាពទីក្រុងប៉ារីស ។ទន្ទឹមនឹងនេះ ភាគីថៃបានឯកភាពទាំងស្រុងលើសភាពគ្រឿងញៀនដែលបានលើកឡើងដោយឯកឧត្តម ឧបនាយរដ្ឋមន្ត្រី កែ គឹមយ៉ាន និងទទួលយកនូវរាល់សំណូមពរសំ
ដៅពង្រឹងកិច្ចសហប្រតិបត្តិការត្រួតពិនិត្យគ្រឿងញៀន។
