រាជធានីភ្នំពេញ:ថ្ងៃអង្គារ ១៤កើត ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៩ ខែមីនា ឆ្នាំ២០១៩ ឯកឧត្ដម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានចូលជាអធិបតីដឹកនាំកិច្ចប្រជុំពេញអង្គអាជ្ញាធរជាតិប្រយុទ្ធប្រឆាំងគ្រឿងញៀនដោយមានការអញ្ជេីញចូលរួមពីឯកឧត្តម ខៀវ កញារិទ្ធ រដ្ឋមន្រ្តីក្រសួងព័ត៌មាន និងឯកឧត្តម លោកជំទាវ លោក លោកស្រី ជាតំណាងក្រសួង ស្ថាប័ន អង្គភាព ជាអនុប្រធាន សមាជិក អាជ្ញាធរជាតិប្រយុទ្ធប្រឆាំងគ្រឿងញៀន និងអ្នកពាក់ព័ន្ធសរុបជិត១០០រូប ដេីម្បីឆ្លងរបាយការណ៍ឆ្នាំ២០១៨ពិនិត្យ និងពិភាក្សាលេីលទ្ធផល ចំណុចខ្លាំង ចំណុចខ្វះខាត ចំណុចសេសសល់ ដែលត្រូវការចាំបាច់សម្រាប់ជាមូលដ្ឋានឆ្ពោះទៅសម្រេចឲ្យបានតាមផែនការ និងទិសដៅដែលយេីងបានដាក់ចេញសម្រាប់ឆ្នាំ២០១៩។
ក្នុងឱកាសនោះ ឯកឧត្តម នាយឧត្តមសេនីយ៍ កែ គឹមយ៉ាន បានថ្លែងថា កម្ពុជានៅតែបន្តទទួលរងឥទ្ធិពលពីការផលិត និងការចរាចរគ្រឿងញៀនទាំងក្នុង និងក្រៅតំបន់ ។
ក្នុងឱកាសនោះដែរ ឯកឧត្តម នាយឧត្តមសេនីយ៍ កែ គឹមយ៉ាន បានកោតសសេីរដល់គ្រប់ក្រសូង ស្ថាប័ន និងអង្គភាពពាក់ព័ន្ធដែលបានខិតខំប្រយុទ្ធប្រឆាំងគ្រឿងញៀនតាមតួនាទីភាកិច្ចរបស់ខ្លួនទទួលបានលទ្ធផលល្អ ។ ទន្ទឹមនឹងនេះ សូមទាញនូវការចាប់អារម្មណ៍ដល់អង្គប្រជុំមានដូចជា :
១. ការងារផ្សព្វផ្សាយអប់រំ លើកកម្ពស់ការយល់ដឹងពីផលប៉ះពាល់ និងគ្រោះថ្នាក់នៃគ្រឿងញៀនបន្តវិវត្តប្រែប្រួលជាវិជ្ជមានពីមួយឆ្នាំទៅមួយឆ្នាំ ហើយសូមបន្តយកចិត្តទុកដាក់បង្កើនការទទួលខុសត្រូវ និងចាត់វិធានការឱ្យបានច្បាស់លាស់ ទាន់ពេលវេលា និងមានប្រសិទ្ធភាពលេីក្រុមគោលដៅប្រឈមព្រោះជនខិលខូច ឬពួកឧក្រិដ្ឋជនគ្រឿងញៀនងាយបោកបញ្ឆោតឱ្យប្រើប្រាស់ ឬអូសទាញឱ្យចូលរួមក្នុងសកម្មភាពរបស់ពួកគេ ដែលអាចធ្វើឱ្យបញ្ហាគ្រឿងញៀន នៅតាមមូលដ្ឋាននៅតែកើតមានជាបន្តទៀត ។
២. ការងារព្យាបាល និងស្តារនីតិសម្បទាអ្នកញៀនគ្រឿងញៀន យើងបានធ្វើការ ពិនិត្យ និងកែសម្រួលនូវទិន្នន័យពាក់ព័ន្ធនឹងចំនួនអ្នកញៀនគ្រឿងញៀនដើម្បីឱ្យមានភាពត្រឹមត្រូវ និងឯកភាពគ្នា ធ្វើជាមូលដ្ឋានក្នុងការរៀបចំឱ្យបានសមស្របនូវរាល់សេវាពាក់ព័ន្ធ ដូចជាសេវាព្យាបាល សេវាស្តារនីតិសម្បទា សេវាបណ្តុះបណ្តាលបំណិនជីវិត សេវាបណ្តុះបណ្តាលវិជ្ជាជីវៈ សេវាគាំទ្រនានាសម្រាប់ដំណាក់កាលនៃការធ្វើសមាហរណកម្មទៅតាមគ្រួសារ និងសហគមន៍វិញ ។ល។
៣. ការងារអនុវត្តច្បាប់ យើងទើបនឹងបានធ្វើសិក្ខាសាលានាពេលកន្លងទៅថ្មីៗនេះនៅខេត្តស្ទឹងត្រែង ដើម្បីធ្វើការស្វែងយល់ឱ្យបានច្បាស់លាស់ និងស៊ីជម្រៅ អំពីមូលហេតុ ក៏ដូចជាកត្តារួមផ្សំផ្សេងៗ ដែលធ្វើឱ្យការចរាចរគ្រឿងញៀនខុសច្បាប់នៅតែបន្តកើតមាន ក៏ដូចជាសិក្សាស្វែងយល់អំពីអ្វីដែលយើងបានអនុវត្តនាពេលកន្លងមក ចំណុចខ្លាំង ចំណុចខ្សោយ វិធានការ ក៏ដូចជាតម្រូវការនានា ដែលអាចជួយឱ្យយើងលើកកម្ពស់ប្រសិទ្ធភាពនៃការអនុវត្តច្បាប់ បង្ការ ទប់ស្កាត់ និងបង្រ្កាបឱ្យកាន់តែមានប្រសិទ្ធភាពនាពេលខាងមុខ ។
៤. ការងារកិច្ចសហប្រតិបត្តិការអន្តរជាតិបានដំណើរការជាប្រក្រតីមានបញ្ហាអ្វីឡើយ ដោយយើងនៅតែរក្សាបានទំនាក់ទំនងល្អជាមួយដៃគូជាអង្គការអន្តរជាតិ ភ្នាក់ងារអង្គការសហប្រជាជាតិ ក៏ដូចជាបណ្តាប្រទេសនានាទាំងនៅក្នុង និងក្រៅតំបន់។
៥. ការងារពង្រឹងយន្តការ ជាការងារគន្លឹះក្នុងការប្រយុទ្ធប្រឆាំងគ្រឿងញៀន អាជ្ញាធរជាតិប្រយុទ្ធប្រឆាំងគ្រឿងញៀនបានសម្រួលមាត្រាព្រះរាជក្រឹត្យ ដើម្បីធានាថា ក្រសួង ស្ថាប័ន និងអង្គភាពជាសមាជិក គណៈកម្មាធិការត្រួតពិនិត្យគ្រឿងញៀនរាជធានីខេត្តទាំងអស់ មានកញ្ចប់ថវិកាផ្ទាល់ខ្លួន ដើម្បីចាត់ចែង និងដោះស្រាយឱ្យមានប្រសិទ្ធភាពនូវរាល់បញ្ហាដែលមានការពាក់ព័ន្ធនឹងគ្រឿងញៀន ។ @LTH
