ខេត្តកំពត ៖ថ្ងៃទី២១ ខែធ្នូ ឆ្នាំ២០១៩ ក្នុងឱកាសប្រជាពលរដ្ឋចូលរួមបុណ្យសមុទ្រយ៉ាងសប្បាយរីករាយក្នុងគោលបំណងលេីកកម្ពស់ចំណេះដឹងពីគ្រោះថ្នាក់នៃគ្រឿងញៀនអាជ្ញាធរជាតិប្រយុទ្ធប្រឆាំងគ្រឿងញៀន ក្រសួងទេសចរណ៍ និងស្ថាប័នមីក្រូហិរញ្ញវត្ថុអិលអូអិលស៊ីរួមគ្នាផ្សព្វផ្សាយពីបញ្ហាគ្រឿងញៀនដល់ប្រជាពលរដ្ឋជាការពញ្ញាក់អារម្មណ៍និងចូលរួមកាន់តែសកម្មលេីសកម្មភាពប្រយុទ្ធប្រឆាំងគ្រឿងញៀនតាមរយះការតាំងពិព៌រណ៍រូបភាពផលវិបាកនៃគ្រឿងញៀន ខិត្តប័ណ្ណផ្ទាំងរូបភាព សារព្រមានសៀវភៅចំណេះដឹងពីគ្រោះថ្នាក់នៃគ្រឿងញៀន និងវត្ថូអនុស្សារីយ៍ផ្សេងៗមាន មួក ប្រតិទិន សម្រាប់ចែកជូនដល់ពួកគាត់យកទៅផ្សព្វផ្សាយបន្តដល់ក្រុមគ្រួសារ មិត្តភក្តិ និងមនុស្សជាទីស្រលាញ់កុំឲ្យធ្លាក់ចូលទៅក្នុងអន្ទាក់នៃគ្រឿងញៀន។
លោក ឡោ សុវិជ្ជា អគ្គនាយកររង ក្រសួងទេសចរណ៍ បានប្រាប់ឲ្យដឹងថា ក្រុមការងារប្រយុទ្ធប្រឆាំងគ្រឿងញៀនក្នុងវិស័យទេសចរណ៍បានមានប្រសាសថា រាល់ពិធីបុណ្យសមុទ្រ និងបុណ្យទន្លេគឺតែងទទួលបានការគាំទ្រចូលរួមទស្សនាយ៉ាងច្រេីនកុះករដែលជាឱកាសសម្រាប់ក្រុមការងារយេីងឆ្លៀតផ្ញេីសារចំណេះដឹងដល់ពួកគាត់បានយល់ដឹងកាន់តែច្បាស់ពីបញ្ហាគ្រឿងញៀន។
ក្នុងនាមជាដៃគូ លោក ដាំ ធី នាយកសាខាមីក្រូហិរញ្ញវត្ថុអិលអូអិលស៊ីខេត្តកំពត បានមានប្រសាសន៍ថា ស្ថាប័នមីក្រូហិរញ្ញវត្ថអិលអូអិលស៊ីLOLCជាគ្រឹះស្ថានហិរញ្ញវត្ថូឯកជនហេីយតែងតែចូលរួមក្នុងសកម្មភាពជួយសង្គមនានាមានជាអាទិ៖ចូលរួមផ្សព្វផ្សាយអប់រំបញ្ហាអនាម័យតាមសាលារៀន ការប្រលងចម្រៀងកុមារ និងការងារបង្ការទប់ស្កាត់បញ្ហាគ្រឿងញៀនជាដេីមហេីយកន្លងមកបានជួយឧបត្ថម្ភគាំទ្រជាមធ្យោបាយ សម្ភារ បម្រេីដល់ការងារសង្គមនានា។
ក្នុងឱកាសនោះ ថ្លែងក្នុងនាមថ្នាក់ដឹកនាំអគ្គលេខាធការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា បានមានប្រសាសន៍ដោយសូមថ្លែងនូវអំណរគុណដល់ក្រសួងទេសចរណ៍ និងស្ថាប័នមីក្រូហិរញ្ញវត្ថុអិលអូអិលស៊ីLOLCដៃគូយ៉ាងជិតស្និទ្ធក្នុងការងារផ្សព្វផ្សាយអប់រំបង្ការទប់ស្កាត់ការរីករាលបញ្ហាគ្រឿងញៀន។
ក្នុងឱកាសនោះដែរ ឧត្តមសេនីយ៍ទោ លឹម តុងហួត ដដែលបានបន្ថែមថា ការងារប្រយុទ្ធប្រឆាំងគ្រឿងញៀនជាការងារពហុវិស័យហេីយត្រូវការការចូលរួមគាំទ្រពីគ្រប់មជ្ឈដ្ឋានប្រជាពលរដ្ឋ និងវិស័យឯកជន ដឹកដៃគ្នា ធ្វេីដំណេីររួមគ្នា ធ្វេីសកម្មភាពរួមគ្នាប្រយុទ្ធប្រឆាំងគ្រឿងញៀនរក្សាសន្តិសុខ សណ្តាប់ធ្នាប់ ភាពសុខសាន្តនិងការអភិវឌ្ឍ ជូនប្រជាពលរដ្ឋដេីម្បីអនាគតកូនចៅយេីង។
ជាមួយគ្នានេះ ឧត្តមសេនីយ៍ទោ លឹម តុងហួត បានឲ្យដឹងទៀតថា រយះពេលពីរថ្ងៃ (ថ្ងៃទី២០-២១)នៃបុណ្យសមុទ្រ ទទួលបានការគាំទ្រពីថ្នាក់ដឹកនាំ ព្រះសង្ឃ មន្រ្តីរាជការ សិស្ស និស្សិត យុវជន យុវនារី ប្រជាពលរដ្ឋ និងភ្ញៀវអន្តរជាតិ មកចូលរួមទស្សនាស្វែងយល់នៅស្តង់ពិព៌រណរបស់អាជ្ញាធរជាតិប្រយុទ្ធប្រឆាំងគ្រឿងញៀនយ៉ាងច្រេីនកុះករ ហេីយសកម្មភាពនេះនឹងបន្តដល់ថ្ងៃទី២២ ខែធ្នូ ឆ្នាំ២០១៩ ដែលជាថ្ងៃបញ្ចប់នៃបុណ្យសមុទ្រផងដែរ។
