បន្ទាយមានជ័យ :ថ្ងៃទី៨ ខែសីហា ឆ្នាំ២០១៨ ស្ថាប័នត្រួតពិនិត្យគ្រឿងញៀនកម្ពុជា ថៃ ដឹកនាំដោយលោកជំទាវ ឧត្តមសេនីយ៍ ជ័យ បុប្ផា អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀន លោកប៉ាស្កន វានិចស៊ីរី និងឯកឧត្តុម អ៊ុំ រាត្រី អភិបាលរងខេត្តបានចុះទស្សនាមណ្ឌលព្យាបាលអ្នកញៀនជិវិតថ្មីភ្នំបាក់ ដែលគ្រប់គ្រងដោយមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ស្ថិតនៅសង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។
ក្នុងឱកាសនោះ លោក ភា មានិត អនុប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត និងជាតំណាងគណគ្រប់គ្រងមណ្ឌលបានប្រសាសន៍ថា មណ្ឌលរបស់លោកមកទល់បច្ចុប្បន្នបានព្យាបាលនិងស្តារនីតិសម្បទា និងសមាហរណកម្មអ្នកញៀនដែលបានជាសះស្បើយបានជាង៤៧០០នាក់ក្នុងនោះស្ត្រី៣០១នាក់ហើយ។
ក្នុងឱកាសនោះដែរ ឯកឧត្តម អ៊ុំ រាត្រី អភិបាលរងនិងជាប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្តបានបន្ថែមថា មណ្ឌលជិវិតថ្មីភ្នំបាក់បានព្យាបាលជនរងគ្រោះដោយសារគ្រឿងញៀនតាមរយ:ការធ្វើចលនាលំហាត់ប្រាណ អប់រំចិត្តសាស្ត្រ ធ្វើពលកម្ម អនាម័យ លេងកីឡា និងបណ្តុះបណ្តាលវិជ្ជាជីវ: កសិកម្ម ចិញ្ចឹមមាន់ ដាំបន្លែ ចឹញ្ចឹមត្រី កង្កែប ជ្រូក កែឆ្នៃផ្លែឈើ កាត់ដេរក្រណាត់ជូតជើង និងកម្រាលជូតជើង ។
ជាមួយគ្នានេះ លោក ប៉ាស្កន វានិចស៊ីរី បានថ្លែងនូវកោតសសើរដល់គណ:គ្រប់គ្រងមណ្ឌលនិងថ្នាក់ដឹកនាំខេត្តបន្ទាយមានជ័យដែលបានខិតខំធ្វើការអភិវឌ្ឍខ្លួនដើរទៅមុខក្នុងការផ្តល់សេវាព្យាបាលអ្នកញៀនគ្រឿងញៀនឲ្យបានជាសះស្បើយនិងធ្វើសមាហរណកម្មទៅរស់នៅសហគមន៍មូលដ្ឋានវិញក្លាយជាពលរដ្ឋល្អចូលរួមកសាងប្រទេសជាតិ។
ក្នុងថ្ងៃដដែលនោះ គណ:ប្រតិភូស្ថាប័នត្រួតពិនិត្យគ្រឿងញៀនទាំងពីរកម្ពុជា ថៃ បានបន្តដំណើរទៅទស្សនាប្រាសាទបន្ទាយឆ្មារស្ថិតនៅក្នុងឃុំបន្ទាយឆ្មារ ស្រុកថ្មពួក មានចម្ងាយ៦០គីឡូម៉ែត្រទីរួមខេត្តបន្ទាយមានជ័យដែលជាកេរដំណែលដូនតាបន្សល់ទុកជូនកូនខ្មែរគ្រប់ជំនាន់គោរពបូជាតទៅ ។
សូមបញ្ជាក់ថាប្រសាទបន្ទាយឆ្មារទទួលបានការឧបត្ថម្ភគាំទ្រជួសជុលឡើងវិញពីសំណាក់ឯកឧត្តម កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងលោកជំទាវ ម៉ៅ ម៉ាល័យ ។
