បន្ទាយមានជ័យ ៖ ថ្ងៃពុធ១០កេីតខែជេស្ឋ ឆ្នាំកុរ ឯកស័ក ពស.២៥៦៣ត្រូវនឹងថ្ងៃទី១២ ខែមិថុនា ឆ្នាំ២០១៩ ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងប្រធានក្រុមការងារថ្នាក់ជាតិចុះមូលដ្ឋានខេត្តបន្ទាយមានជ័យបានអញ្ជេីញជាអធិបតីក្នុងពិធីប្រកាសចូលកាន់តំណែងក្រុមប្រឹក្សាខេត្តបន្ទាយមានជ័យអាណត្តិទី៣ ដោយមានការអញ្ជេីញចូលរួមពីក្រុមការងារថ្នាក់ជាតិ ថ្នាក់ក្រោមជាតិ មន្រ្តីរាជការ អាជ្ញាធរមូលដ្ឋាន យុវជន និងកងកំលាំងគ្រប់ប្រភេទជាង១០០០នាក់នៅសាលាខេត្តបន្ទាយមានជ័យ។
ក្នុងឱកាសនេះ ថ្លែងក្នុងនាមរាជរដ្ឋាភិបាលកម្ពុជា ឯកឧត្តម នាយឧត្តមសេនីយ៍ កែ គឹមយ៉ាន បានថ្លែងអបអរសាទរ កោតសសេីរ និងវាយតម្លៃខ្ពស់ ចំពោះសមាជិក សមាជិកាក្រុមប្រឹក្សាខេត្តបន្ទាយមានជ័យដែលត្រូវបានតំណាងប្រជាពលរដ្ឋគឺសមាជិកក្រុមប្រឹក្សាឃុំសង្កាត់បោះឆ្នោតផ្តល់សេចក្តីទុកចិត្ត ដេីម្បីបន្តដឹកនាំខេត្តបន្ទាយមានជ័យឲ្យបន្តរីកចម្រេីនលេីគ្រប់វិស័យបន្ថែមទៀត ដោយត្រូវតែខិតខំបម្រេីផលប្រយោជន៍ និងសេចក្តីត្រូវការរបស់ប្រជាពលរដ្ឋទាំងអស់ដោយស្មេីភាព យុត្តិធម៌ មិនប្រកាន់និន្នាការនយោបាយ។
ក្នុងឱកាសនោះដែរ ឯកឧត្តម នាយឧត្តមសេនីយ៍ កែ គឹមយ៉ាន បានថ្លែងបន្តថា ការពង្រឹងសាមគ្គីភាព ឯកភាពផ្ទៃក្នុងឲ្យបានល្អនៅក្នុងក្រុមប្រឹក្សា គណ:អភិបាល មន្រ្តីរាជការ និងកងកំលាំងមានសមត្ថកិច្ចគ្រប់លំដាប់ថ្នាក់ដោយឈេីលេីមូលដ្ឋានលេីកកម្ពស់ប្រសិទ្ធភាពការងារ ការគោរពច្បាប់ គោលការណ៍នានារបស់រដ្ឋ និងពង្រឹងរបៀបរបបធ្វេីការដេីម្បីលេីកកម្ពស់ការទទួលខុសត្រូវ និងភាពជាម្ចាស់របស់មន្រ្តីនៅក្នុងការបំពេញតួនាទី ភារកិច្ចរបស់ខ្លួន សំដៅអភិវឌ្ឍមូលដ្ឋាន និងឆ្លេីបតបចំពោះតម្រូវការរបស់ប្រជាពលរដ្ឋ គឺធ្វេីឲ្យយេីងសម្រេចគោលដៅមូលដ្ឋានមានការអភិវឌ្ឍ និងជីវភាពរស់នៅរបស់ប្រជាពលរដ្ឋមានការប្រសេីរឆ្ពោះទៅប្រទេសមានចំណូលមធ្យមកម្រឹតខ្ពស់នៅឆ្នាំ២០៣០ ។
សូមបញ្ជាក់ថាក្រុមប្រឹក្សាខេត្តបន្ទាយមានជ័យ អាណត្តិទី៣ មានចំនួន២៥រូប ដែលមានឯកឧត្តមខេង ស៊ុម ជាប្រធានក្រុមប្រឹក្សាខេត្ត។
