ព្រឹកថ្ងៃទី១ ខែវិច្ឆិកាឆ្នាំ២០១៨ ឯកឧត្តម នាយឧត្តមសេនីយ៍ ជួនសុវណ្ណ អនុប្រធាន តំណាងដ៏ខ្ពង់ខ្ពស់ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀនបានអញ្ជើញចូលជាអធិបតីបើកបវេសនកាលឆ្នាំសិក្សាថ្មីនៅវិទ្យាល័យឥន្ទ្រទេវី ដោយមានការអញ្ជើញចូលរួមពីឯកឧត្តម លោកជំទាវ លោក លោកស្រី មាតាបីតាសិស្ស លោកគ្រូ អ្នកគ្រូ គណគ្រប់គ្រងសាលា សិស្សនុសិស្ស សរុប៥០០នាក់ ។
លោក នាក់ សុទ្ធា នាយកតំណាងគណគ្រប់គ្រងសាលា បានថ្លែងស្វាគមន៍ អរគុណដល់គណអធិបតី ភ្ញៀវកិត្តិយស និងរបាយការណ៍ពីវឌ្ឍនភាពការរីកចម្រើនរបស់សាលាទាំងផ្នែកហេដ្ឋារចនាសម្ព័ន្ធ កីឡា និងបរិស្ថានស្អាត សំដៅបម្រើដល់ការរីកចម្រើនផ្នែកបញ្ញា សុខភាព ដល់សិស្សានុសិស្ស។
លោក ប៉ាង លីដា តំណាងគណកម្មាធិការត្រួតពិនិត្យគ្រឿងញៀនខណ្ឌទួលគោក បានអាននូវសាររបស់សម្តេចតេជោ ហ៊ុន សែន នាយករដ្ឋមន្ត្រី បានថ្លែងអំណរគុណដល់ក្រសួង ស្ថាប័ន អង្គការជាតិ អន្តរជាតិ ដៃគូអភិវឌ្ឍ អាជ្ញាធរដែនដីគ្រប់លំដាប់ថ្នាក់សប្បុរសជននានា ព្រះសង្ឃ ចាស់ព្រឹទ្ធាចារ្យ បព្វជិតសាសនា ដែលបាននឹងកំពុងជួយឧបត្ថម្ភគាំទ្រយ៉ាងសកម្មដល់ការងារអប់រំ និងបានផ្តាំផ្ញើដល់សិស្សានុសិស្ស យុវជន យុវនារីទាំងអស់ត្រូវខិតខំរៀនសូត្រឲ្យបានខ្ជាប់ខ្ជួនព្រមទាំងចូលរួមគ្រប់សកម្មភាពសង្គមនានាដើម្បីគាំទ្រដំណើរការអភិវឌ្ឍន៍សាលារៀននិងសង្គមជាតិរបស់យើងហើយត្រូវចងចាំថាបើស្រឡាញ់ខ្លួនយើង ឪពុកម្តាយ ស្រឡាញ់អនាគតរុងរឿងក្មួយៗត្រូវនៅឲ្យឆ្ងាយពីគ្រឿងញៀន អំពើអបាយមុខផ្សេងៗនិងអំពើអសកម្មនានា។
ក្នុងឱកាសនោះ ក្នុងនាមឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ឯកឧត្តម នាយឧត្តមសេនីយ៍ ជួន សុវណ្ណ បានថ្លែងការកោតសសើរដល់ការរីកចម្រើនរបស់សាលាសំដៅប្រសិទ្ធភាពគុណភាពសិក្សារបស់សិស្សនិងបានសំដែងនូវមនោសញ្ចេតនាសប្បាយរីករាយក្រៃលែងជាមួយនឹងឯកឧត្តម លោកជំទាវ លោក លោកស្រី លោកគ្រូអ្នកគ្រូ និងក្មួយៗជាសិស្សានុសិស្សទាំងអស់ ក្នុងពិធីបើកបវេសនកាលឆ្នាំសិក្សា ២០១៨ – ២០១៩ ។
ក្នុងឱកាសនោះដែរ ឯកឧត្តម នាយឧត្តមសេនីយ៍ ជួន សុវណ្ណ បានថ្លែងបន្ថែមទៀតថា ការចូលរួម និងគាំទ្រទាំងអស់គ្នា ពីក្មួយៗគឺជាកម្លាំងដ៏មានសក្តានុពលបំផុតក្នុងការបង្ការ និងទប់ស្កាត់បញ្ហាដែលមានការពាក់ព័ន្ធនឹងគ្រឿងញៀន ។ ការប្រើប្រាស់ ឬការពាក់ព័ន្ធនឹងគ្រឿងញៀន មិនត្រឹមតែប៉ះពាល់ធ្ងន់ធ្ងរដល់សុខភាព ជីវភាព និងសុវត្ថិភាពរបស់បុគ្គលប៉ុណ្ណោះទេ តែវានឹងប៉ះពាល់ផងដែរ ដល់គ្រួសារ សហគមន៍ និងសង្គមជាតិទាំងមូលផងដែរ ។ ទន្ទឹមនោះ ច្បាប់ស្តីពីការត្រួតពិនិត្យគ្រឿងញឿនរបស់យើងក៏មិនលើកលែងដែរដល់ជនទាំងឡាយណាដែលមានការពាក់ព័ន្ធនឹងគ្រឿងញៀន គឺត្រូវផ្តន្ទាទោសទាំងអស់ ហើយក្នុងករណីធ្ងន់ធ្ងរ គឺត្រូវផ្តន្ទាទោសដាក់ពន្ធនាគារអស់មួយជីវិត និងអាចរឹបអូសរាល់ទ្រព្យសម្បត្តិដែលមានការពាក់ព័ន្ធនឹងបទល្មើសនេះផងដែរ ។ ហេតុនេះ សូមក្មួយៗ ស្វែងយល់ឱ្យបានច្បាស់ និងសូមឱ្យមានការប្រុងប្រយ័ត្នខ្ពស់ កុំឱ្យវាចូលមកក្នុងជិវិត និងបំផ្លាញអនាគតដ៏ស្រស់ថ្លារបស់ក្មួយៗ ។
ក្នុងឱកាសនោះផងដែរ ឯកឧត្តម នាយឧត្តមសេនីយ៍ ជួន សុវណ្ណ បាននាំយកអំណោយរបស់ ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ម៉ៅ ម៉ាល័យ ឧបត្ថម្ភជូន :
១.ឧបត្ថម្ភគ្រូចូលនិវត្តន៍ ៤៤នាក់ ក្នុង ១នាក់ ទទួលបាន សារុង១ និងថវិកា៥ម៉ឺនរៀល
២.សិស្សនិទ្ទេស A ១នាក់ ទទួលបាន ៥០ម៉ឺនរៀល
៣.យុវជនកាយរិទ្ធ១លានរៀល
៤.យុវជនកាកបាទក្រហម ថវិកា១លានរៀល
៥.វិទ្យាល័យឥន្ទ្រទេវី ថវិកា២លានរៀល
៦.សិស្សពូកែចំនួន១៨៦នាក់ ក្នុង១នាក់ ទទួលបានសៀវភៅសរសេរ ៥ក្បាល និងប៊ិច២ដើម និងថវិកា ២ម៉ឺនរៀល
៧.សិស្សជួបការលំបាកផ្នែកជីវភាព ចំនួន ២១នាក់ ក្នុង១នាក់ ទទួលបានកាបួប ១ និងសម្ភារសិក្សារ រួមមានសៀវភៅ ៥ក្បាល ប៊ិច ២ដើម បន្ទាត់ត្រង់ បន្ទាត់កែង បន្ទាត់រ៉ាប៉ទ័រ បន្ទាត់ប៉ារ៉ាបូ ដែកឈាននិងថវិកា៥ម៉ឺលរៀល
៨.កសាងតារាងបាល់បោះ ថវិកា៨ពាន់ដុល្លា
