រាជធានីភ្នំពេញ :ស្ថាប័នប្រយុទ្ធប្រឆាំងគ្រឿងញៀនកម្ពុជានិងតំណាងស្ថានទូតរុស្ស៊ី បានជួបពិភាក្សាការងារប្រយុទ្ធប្រឆាំងគ្រឿងញៀន ។
ដែលជំនួបនេះប្រព្រឹត្តទៅនាថ្ងៃទី១២ ខែកក្កដា ឆ្នាំ២០១៨ នៅអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនក្រោមអធិបតីភាពឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន និងលោកវ៉ាឡង់ទីន ឌីគូឈីន (Valentin Dikushin)ទីប្រឹក្សាអមស្ថានអគ្គរដ្ឋទូតរុស្ស៊ី ប្រចាំកម្ពុជា។
ក្នុងឱកាសនោះ ឯកឧត្តម នាយឧត្តមសេនីយ៍ មាស វិរិទ្ធ បានមានប្រសាសន៍ឲ្យដឹងថា កិច្ចពិភាក្សានេះធ្វើឡើងដើម្បីបន្តពង្រឹងកិច្ចសហប្រតិបត្តិការការងារត្រួតពិនិត្យគ្រឿងញៀននៃប្រទេសទាំងពីរ ពិសេសផ្តោតសំខាន់ទៅលើអនុស្សារណយោគយល់គ្នាលើការងារប្រយុទ្ធប្រឆាំងគ្រឿងញៀន ដែលសំដៅទៅការលុបបំបាត់ការចរាចរគ្រឿងញៀនខុសច្បាប់។
ក្នុងឱកាសនោះដែរ ឯកឧត្តម នាយឧត្តមសេនីយ៍ មាស វិរិទ្ធ បានបន្តថា តាមរយះការពិភាក្សានេះ ភាគីទាំងពីរកម្ពុជា រុស្ស៊ី បានប្តេជ្ញាពង្រឹងនូវកិច្ចសហប្រតិបត្តិការល្អជាមួយគ្នាបំពេញឲ្យគ្នាទៅវិញទៅមកដើម្បីឲ្យការងារប្រយុទ្ធប្រឆាំងគ្រឿងញៀនប្រព្រឹត្តទៅដោយរលូនជោគជ័យ ។
