បាត់ដំបង :ថ្ងៃទី២៩ ខែវិច្ឆិកា ឆ្នាំ២០១៨ ក្រុមការងារកម្ពុជាដឹកនាំដោយឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា និងក្រុមការងារថៃ ដឹកនាំដោយលោកចារ៉ែ ប៉ុកប៉ា ទីប្រឹក្សាជាន់ខ្ពស់ទទួលការងារគ្រឿងញៀនថៃប្រចាំកម្ពុជា ដោយមានការចូលរួមពីអាជ្ញាធរភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង(កម្ពុជា) និងតំណាងក្រុមប្រឹក្សាត្រួតពិនិត្យគ្រឿងញៀនថៃតំបន់២ អាជ្ញាធរភូមិសនស៊ុម ស្រុកសយដាវ ស្រុកប៉ុងណាំរ៉ង ខេត្តចាន់បុរី (ថៃ) ដែលពិធីនេះប្រារព្ធធ្វើនេះនៅភូមិអូរអន្លក់ ឃុំតាសែន ស្រុកកំរឿង ខេត្តបាត់ដំបង។
លោក ឧត្តមសេនីយ៍ឯក ហួត សុផល្លី បានមានប្រសាសន៍ថា ការរៀបចំភូមិសគ្មានគ្រឿងញៀននៅតាមព្រំដែនគឺទទួលបានការគាំទ្រពីប្រមុខរាជរដ្ឋាភិបាលប្រទេសយើងទាំងពីរកម្ពុជា-ថៃ និងអាជ្ញាធរជាតិប្រយុទ្ធប្រឆាំងគ្រឿងញៀន(កម្ពុជា) ក្រុមប្រឹក្សាត្រួតពិនិត្យគ្រឿងញៀន(ថៃ)។
លោកចារ៉េ ប៉ុកប៉ា ទីប្រឹក្សាជាន់ខ្ពស់ទទួលការងារគ្រឿងញៀនថៃប្រចាំកម្ពុជា បានមានប្រសាសន៍ថា ការចូលរួមពីគ្រប់ផ្នែកពាក់ព័ន្ធក្នុងមូលដ្ឋានគឺជាកំលាំងដ៏សំខាន់ធ្វើអោយភូមិឃុំរបស់យើងក្លាយជាភូមិសគ្មានគ្រឿងញៀនបាន។
ក្នុងឱកាសនោះ ឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀនបានប្រសាសន៍ថា ភូមិស គ្មានគ្រឿងញៀន គឺជាភូមិគ្មានការដាំដុះ រក្សាទុក ជួញដូរ ចែកចាយ និងប្រើប្រាស់គ្រឿងញៀន និងជារបាំងដ៏រឹងមាំទប់ស្កាត់បញ្ហាគ្រឿងញៀនឆ្លងកាត់ព្រំដែន ។
ក្នុងឱកាសនោះដែរ ឯកឧត្តម ឧត្តមសេនីយ៍ឯក នាក់ យុទ្ធា បានថ្លែងបន្តថា ការរៀបចំយន្តការភូមិស គ្មានគ្រឿងញៀនគឺរៀបចំឲ្យមាន : មានកន្លែងព្យាបាលអ្នកញៀនគ្រឿងញៀនជាសះស្បើយពីភាពញៀន មានសកម្មភាពផ្សព្វផ្សាយអប់រំឲ្យប្រជាពលរដ្ឋមានការយល់ដឹងពីផលប៉ះពាល់នៃគ្រឿងញៀន ទប់ស្កាត់ការចរាចរណ៍ប្រើប្រាស់គ្រឿងញៀនពិសេសក្មួយៗដែលចំណាកស្រុកទៅធ្វើការនៅឆ្ងាយ អាជ្ញាធរ-មន្រ្តីអនុវត្តច្បាប់មានសមត្ថកិច្ចជួយផ្សព្វផ្សាយអប់រំប្រជាពលរដ្ឋអ្នកមិនទាន់ប្រើប្រាស់បានយល់ដឹងដោយមិនទៅជិតប៉ះពាល់គ្រឿងញៀននិងជម្រុញអ្នកប្រើប្រាស់ឲ្យទៅទទួលយកសេវាព្យាបាលនៅតាមមណ្ឌលសុខភាពក្នុងឃុំដោយមិនគិតថ្លៃ។
សូមបញ្ជាក់ថា មកទល់ពេលនេះ កម្ពុជា ថៃ បានសហការរៀបចំបង្កើតបានភូមិសគ្មានគ្រឿងញៀនចំនួន៥ហើយ គឺនៅខេត្តស្ទឹងត្រែង ចំនួន២ភូមិ និងខេត្តព្រះវិហារ ចំនួនបីភូមិ។
